الأحد، 14 أكتوبر، 2012

الارتجالة الرابعة والعشرون: النص الأخير "شد وجذب"



مشهد 1
يجلسا على رصيف من أرصفة الجامعة  بينما تمر   من امامهما  فتاه فيلتفت لها الشاب  ويظل بصره معلقًا بها
-اييييييييييييييه الدنيا؟
- تمام   
-طب امشى امشى  يقولها وهو ينهض  ويذهب باتجاه الفتاه
يعود لها مبتسما :متبصش لمين يا ماما  ما يجيبها إلا  رجالها
-شكلك هتقع يابرنس وهتنسانا
عيب انا ليا غيرك يا جميل
تضحك بفرحة وتتمنى لو قالها  من قلبة
مشهد 2
تحدثه عبر الهاتف :ايه يا عم  فينك بقالك فترة لا بتتصل ولا بتسأل  نسيتنا خلاص
يأتيها صوته مغمغما:لا والله مش كدة بس
ما انتى عارفة يعنى  سيبك المهم انتى اخبارك ايه طمنينى عليكى
- لا فيك الخير يا اخويا
-بجد بقى عاملة ايه واخبار خطيبك ايه ؟
- يا ابنى انا فسخت من بدرى
- بتهزرى
- تؤ
ثم يعلو صوتها بالضحك :  إيه مش ناوى انت كمان ولا ايه
-         يا ساتر
-         بكرة نشووووووف
مشهد 3
تجلس امام  الكمبيوتر  تنظر من آن لآخر على صورته وتتمنى لو كان متواجد لتحدثه
تنهض لتشرب ولكن تجده يتصل بها عبر الجهاز تجرى بلهفة وتضع  السماعة وتقول بلهجة حاولت ان تكون مرحة :حبيب قلبى
يفجائها بلهجة هادئة توحى بالاكتئاب :ازيك ....واحشانى
- يا سلام  يا ندل
- ندل طب الحق عليِّه
-لالالا استنى هنا رايح فيييين
ايه مالك قافش كدة ؟
ثم بلهجة ذات مغزى : مزعلاك ولا إيه
-         ما راحت يا اختى
-         تحاول ان تخفى الفرحة فى صوتها وهى تقول :اوووه ليه كدة ؟
-         اهو اللى حصل
-         -لا بجد فيه ايه
-         لما اشوفك هبقى اقولك
-         اوك هبقى اشوف الدنيا واكلمك نحدد بكرة
-         هأ  ماشى يا ست المهمة  هستنى اتصالك ...سلام
-         سلام تضع السماعة جانبا  وهى تغلق عينيها وتقول بصوت هادئ: واحشنى
مشهد4
-  بعصبية شديدة تقول :خلاص انت حر
بعصبية مماثلة ومن بين اسنانه: يعنى ايه انت حر
بضيق:بص بقولك ايه  الموضوع ده شكله كدة مش نافع
ينظر لها فى ذهول :انتى بتستهبلى
بصوت اشبة بالصراخ :لأ مبستهبلش  ثم تخطف حقيبتهاوتبتعد مسرعة
مشهد5
تجلس امام الكمبيوتر وتراه on line
ازيك L
-ازيك 
اخبارك ايه؟
-تمام
ايه فينك كدة
-فى الدنيا
المهم انتى اخبارك ايه ؟
وصلتى لفين
-ل ولا حاجة
حبيت وسبت
خطبت وفسخت
كدة يعنى
المهم مش هشوفك ؟
-تمام  فاضية امتى ؟
-دلوقتى J
- هههههه ماشى
  هخلص شغل واكلمك
مشهد 6
يجلسا على احد (كافيهات ) وسط البلد
يحاول التركيز على اللا شئ لكى يتجنب النظر إليها ويقول ببطء:مش هينفع  مش هينفع
بصى احنا كدة تمام  اصحاب جامدين جدا 
بوجه مكفهر انا مش قادرة اتخيلك ولا اتخيلنى مع حد تانى
بنصف ابتسامة يقول :يعنى هو انتى  قادرة تتخيلينا مع بعض
زينب زكريا


ليست هناك تعليقات:

إرسال تعليق