السبت، 1 يونيو، 2013

الارتجالة الثانية والثلاثون: النص الأول


أنا شاهد على جرحه
وبأشهد إن قلبه
فيه نزيف جوه
مرار طافح حلاوة روح
بيرقص رقصة المدبوح
ويتلوى على صبره
يشوف بعينيه خيال الظلم
بيوصل لباب قبره
وصبره ع القبور صبار
ومروي مرار
 وشيلة هم
بيضحك .. القبور تحتار
وتشهدله بخفة دم
أعض صوابع الحسرة
على موته اللي ف النشرة
خبر متعاد
وتجري الناس
وتفرح بالدهب قشرة
عشان بكره
تجيب ف ولاد


محمود سراج

ليست هناك تعليقات:

إرسال تعليق