الجمعة، 4 مايو، 2012

الارتجالة الحادية والعشرون: النص الخامس


* سيكا يجلس على القهوة يشرب الشاي، مر عليه عم زكريا ألقى التحية وطلب الشاي. وجلس يحدثه.
عم زكريا: أوووف!
سيكا: مالك كده يا عم زكريا؟ على الصبح كده!
عم زكريا: إيه رأيك في الدستور يا واد يا سيكا؟
سيكا: دستور إيه؟
عم زكريا: الدستور بتاع مصر.
سيكا: دستور يا أسيادنا.
       يا عم مصر دي أم الدنيا.. هي دي محتاجة دستور!
عم زكريا: أيوه بس الدستور ده و اللي بيحميك ويحميني.. وهيرجعلنا حقوقنا.. ويرسم مستقبلنا.
سيكا: مستقبل إيه يا عم! إنت بتحلم! علم الغيب ده عند الله!
       وبعدين الدستور ده أخره يحدد لنا مين اللي هيمسك البلد بعد المخلوع، ويكشفلنا جنسية أمي وأمك لو فكرنا نترشح للرئاسة J
عم زكريا: أنا غلطان يا سيكا إني سألتك أصلاً.
سيكا: اصبر بس ميبقاش خلقك ضيق كده، فهمني بالراحة ايه اللي مضايقك؟
عم زكريا: طب إنت قلت إيه في الاستفتاء؟
سيكا وهو يغني ويرفع ذراعيه راقصًا:
"كل ما أقوله آه، يقولي هو لأ، كل ما أقوله لأ، يقولي هو آه"
عم زكريا: يا ابن اللذين، فهمتها وهي طايرة يا واد يا سيكا.. فعلاً هي دي سياسة المجلس.. بس أنا مفهمتش إنت قلت إيه بردو؟
سيكا: يا عم الحمد لله كلنا مسلمين وموحدين بالله.
عم زكريا: يعني إيه؟
سيكا: يعني قلت نعم طبعًا.. وأهي جت على دماغنا ودماغ اللي خلفونا.
عم زكريا: وإيه دخل الديانة في الاستفتاء؟
سيكا: يا عم إنت نايم على روحك؟ ما المسلمين قالوا آه والتانيين قالوا لأ.
عم زكريا: التانيين! طب على فكرة بقى.. أنا قلت لأ.
سيكا: يالهوي! وخالفت شرع الله؟
عم زكريا: لا إله إلا الله.
           يا عم إنت هتكفرني! وبعدين ما إنت لسه قايل بعضمة لسانك إنها جت على دماغنا.
سيكا: آه صحيح نسيت.
عم زكريا: نسيت!
        وأنا اللي كنت جاي أكلمك في موضوع مهم.
سيكا: خير يا عم زكريا؟
عم زكريا: كنت عايز اسألك هي أغنية "كل ما أقوله آه يقولي هو لأ" بتاعة مين؟

عهود كاشف عن "الاستفتاء على الدستور"

ليست هناك تعليقات:

إرسال تعليق