الحلم نبتة صغيرة
في حضن الجبل
مسقية نور
مسقية شمس
مسقية كلمة منورة بين السطور
***
الحلم بقى طول السحاب
فيه كل حاجة ملهمة
لون الخضار
والدلايات المدهبة
وأصوات غصونها المبهجة
ولمس الندا المسحور
***
الحلم ساكن في الجدور الميتة
ومتبتة في حضن التراب
الجدر ما بيعتبش ع الأرض البوار
لكن بيعتب ع الليالي المجحفة
وسنين جفا
ونقطة مطر
ماروتش حلمه ودوِبت حضن الجبل
***
الحلم بقى حبة حطب متسلسلين
ولو حتى كان سلسال دهب
يفضل حزين
مستني عود كبريت وحيد
يفك أسره وينطلق دخان
***
الحلم ورقة شجر دبلانة ع السكة
خايفة من اللمسة
ومن دبة النملة
***
الحلم وردة في حضنك الأصفر
مصممة تبقى
هبه رفعت
ليست هناك تعليقات:
إرسال تعليق