مقام "سيدي"

إلى نجيب محفوظ

جوه الحارات أنبيا ..
والوحي: صمت الناس

بنيان متين مشدود
مصبوب بطمي النيل

والبوظة شاربة العقول
ومسهرة القناديل ..

والوقت عايز يفر:
نوم السهارى تقيل
قاتل وهو القتيل

يا أم الصراخ والهديل
يا محيره المناديل
دمعك ده ولا التاريخ،
منشور على حبل الغسيل؟
***

جوه الحارات صلوات
خلخال ورن بثبات
لين قلوب الجبابرة
وقلقل الأموات

جوه الحارات أسئلة:
قبور في صدر الخلا
ونذور لرد البلا
وحجاب يعري الحيطان

جوه الحارات الخنوع:
ولد الألم والجوع
وبكره والممنوع
وبياعين الرضا

جوه الحارات الـ"عمل"
جرح العليل ما اندمل
صابر، وإيه الحياة:
غير صبر ليلة وأمل

جوه الحارات السكوت
"عمل" سفيل منحوت
فكه في يد الغيب ..
مربوط على نبوت

جوه الحارات دنيا ..
قسمة، وقدر، ونصيب
شمس، وقمر، ونجيب
وحكـــــــــــــاوي
مالها حصر ..

جوه الحارات: البدء
والبدء كان: في الكلمة
والكلمة كانت: مصر

محمد طلبة رضوان