الارتجالة السابعة والأربعون: مغناطيس

بحبك

مرحلة عدت

وحبك طوق محاوطني

بحبك

والخطي مدت

اليكي

وروحي سابتني

بحبك

بس مش شايفك

جميلة

بس مشدودلك

انا لو قلبي يسالني

هاقووله اعقل

وفارقها

وهاتكلم

وعيني

بس شايفاكي

حروفي

بكل مافيها

هتتحول لكلمة

حب تلاقاكي

انا عقلي

هرب مني

وادور التقيه معاكي

خالد عليِّ

الارتجالة الرابعة والأربعون: النص السادس

بلياتشو شكلو يبهج...

ألوان متزوقة...

اسعد عينك هاتضحك

لو تنزل بحلقة...

بينط كمان..ويلعب...

ياحلاوة البهججة...

ياسلام على الحلاوة

ده الدنيا مبهجة....

غلطان وعاملي فالح عاشق للخبطة..

عيل نازل بعينه عالدنيا شخبطة

تايه وعاملي سايح ..

راجع وعاملي رايح...

مبسوط وسط الفضايح..

عايش ع المرمطة

خالد عليّ

الارتجالة الرابعة والأربعون: النص الثالث

ربك خلقها بعشوائيه منظمة

تعرفها كاملة لكن تشوفها مقرطمة

ألوان كتير.. حلوة لكن متفرقة ..

حتة صفار وسمار كبيرة مبرقة

الأبيض ظهر ليلتين وراح طول السنة

الأسود مركز.. والبشر متعكننة

والبمبي واضح من بعيد عن حينا

أخضر مقطع  طل الأحمر قطعه....

الأزرق يقرب.. كله داق ايه يوجعه

حبة تفاؤل والأمل والمعلمة...

توفيق كمان تصبح حياتنا مقلمة

خالد عليّ

الارتجالة الثالثة والأربعون: النص الأول

 مغرور وعامل فتك

فرحان بصنع الحريق

فاهم ده ولا حمار

وماشفش أخر الطريق

محروق أبوه الغبي

من يومها وإحنا ف حريق

خالد عليّ

الارتجالة الحادية والأربعون: النص التاسع

بولا بولا

تاتا تاتا

يلا يوم

سنتين تلاته

حبة حبة

يوم تعب

ويومين محبة

هو عمرك عدى فين

ولا عدي امتى

اجري اجري

لو تبص يمين شمال

مش هاتلحق

ياللا اجري

الزمن خلانا نجري

عمرنا قدامنا يجري

طب نريح نص ساعة

أو نعدي يومين لكاعة

حتى نقرا اللي انكتب

في شريط حياتنا

الخازوق

الدنيا ثابتة

كل حاجة هي هي

لو تبص شمال يمين

هي هي

الوشوش الباينة برضك هي هي

بس وشك لو تشوف مش هو هو

يعني خدعة

ايوة خدعة

خالد عليّ

جمال بخيت يكتب عن "مغامير"

جمال بخيت: مشاعر شاعر، صباح الخير، 9 أغسطس 2005

الارتجالة الحادية عشر: تلاتين سنة

تلاتين سنة عمر الجواز من حضرته

تلاتين سنة لا يهدها لا تموته

بدأ الحكاية بغمزتين وضحكلها

لما بهرها صدقت قربلها

وقعت في حبه كَل حبوبها وذلَّها

تلاتين سنة واقفين قصادها يعيطو

تلاتين سنة 30 شيطان يستعبطو

   

                                                                                                                   خالد علي

الارتجالة السابعة، إبريل 2010: النص الرابع

الكون

طاير ببحلق

الكون جميل من فوق

الرب خالقه بذوق

البحر كنت بشوفه خوف

وبشوفني فيه ميت غريق

من فوق رأيت فيه الطريق

نقش الجدود أنا لما شوفته عن قريب

حسيت بإنّي في الوطن عايش غريب

شفت العدالة

وانسجام الذكريات

شفت اختزال الحلم..

في رسوم وحكايات

والحكمة سهلة.. بس مين عايز يشوفها

الحكمة كلمة ربّ..

بنجمّع حروفها

خالد علي

الارتجالة السابعة، إبريل 2010: قَيّلت ساعة

قَيّلت ساعة

قَيّلت ساعة... بعد أكلة تبن دِسمة

ولقيته طاير ف السما

والجو نسمة

ولقيتني سايقه..

وضحكته مرسومة رسمة

قَيّلت ساعة

بعدها قَيّل كتير

رَيّحت منه

لما فكّر يوم يطير

كانت نهايته

في الزمان اللي انتظرته

ياما بخيالي روحتله

وبقلبي زرته

أنا سُقته ساعة

ياما ساقني سنين طويلة

خلّيته طاير بجناحات قش وهزيلة

ورّيته جنة لم يشوفها يوم في عمره

ورّيته شمس الكون

كمان لّمسته قمره

ورّيته رسمه اللي اترسمله من زمان

رمز العدالة اللي اترسم

شاف الميزان

..

قَيّلت ساعة

بس كانت كل عمري

من قبل ساعة كان بإيده كل أمري

مين الحمار؟؟

اللي اتربط ودماغه فيه؟؟

ولا حر لكن..

عقله ضاع من بين إديه !

خالد علي